O medo

Boa tarde!

Despois dunha semana un pouco a trompicones entre o festivo e os virus aquí traemos novas da rebuldaina!

Co galo da celebración do Samaín  tivemos uns días nos que traballamos moi intensamente a emoción do medo.

O medo é unha sensación habitualmente desagradable que xurde cando cremos que estamos en perigo (real o imaxinado). O medo tamén nos mantén alerta e a salvo xa que correríamos moitos riscos se nunca tivéramos medo pero cando crece moito, moito, entón convírtese en terror.

Na clase falamos de moitas cousas sobre o medo, estivemos pensando cousas que nos deran medo a cada un de nos e ían desde animais como arañas, lembranzas de personaxes de televisión ou á famosa escuridade ata sensacións moi concretas como "a perderme de papá e mamá" ou "a quedarme só" ao que algún rápidamente respondeu "se te pasa iso búscame a min!" e é que a ningún nos gusta pasar medo...

Ademáis pensamos cousas que facer cando temos medo e saíron moitas ideas tanto do que soemos facer como do que poderiamos facer: berrar, escondernos, fuxir, respirar, cantar, atacar, pensar en cousas divertidas, etc.

Fixemos moitas outras labores arredor da sensación de medo, pensar de que cor a imaxinamos, inventar a nosa poción, escribir o noso nome de forma terrorífica, e incluso imaxinar de qué pode ter medo a persoa representada na obra "O grito" de Munch.

Ao final, despois de tanta conversa, idea e traballo quedáronnos uns libros do medo ben chulos que agardamos que vos gustaran!